ბატონი ქაუგილი უკვე 21 წელია საქართველოში მოღვაწეობს. იგი არის ქართულ-ამერიკული უნივერსიტეტის (GAU) თანადამფუძნებელი და პრეზიდენტი, საქართველოში ამერიკის სავაჭრო პალატის პრეზიდენტი და ენერგეტიკისა და მრეწველობის მართვის საკონსულტაციო ფირმის თანადამფუძნებელი და პრეზიდენტი. მას გააჩნია 42 წელზე მეტი პერიოდის განმავლობაში 40 ქვეყანაში ენერგეტიკისა და განათლების სექტორებში ყველა ფაზის პროექტების მართვის გამოცდილება პროექტის/ მშენებლობის მენეჯმენტზე ფოკუსირებით; ასევე გამოცდილება გარემოსდაცვითი, რეგულატორული ჩარჩოს და სტრატეგიული ანალიზის, ოპერაციული რისკების მართვის, კორპორაციული სოციალური პასუხისმგებლობისა (CSR) და გლობალური ბიზნეს განვითარების მიმართულებებით. 1999-2003 წლებში ბატონი ქაუგალი იყო საქართველოს მთავრობის მრჩეველი ბაქო-თბილისი-ჯეიჰანის (ნავთობი) და სამხრეთ კავკასიის (ბუნებრივი აირი) მილსადენების პროექტების იმპლემენტაციასთან დაკავშირებით, სადაც მთავრობას უწევდა სტრატეგიულ, რეგულატორულ და ტექნიკურ მხარდაჭერას. ბატონი ქაუგალი არის რამდენიმე სამეთვალყურეო საბჭოს და არასამთავრობო ორგანიზაციის საბჭოს, ასევე საზედამხედველო კომიტეტის წევრი. იგი საქართველოსა და ამერიკის შეერთებული შტატების მოქალაქეა, ფლობს მექანიკური ინჟინერიის ბაკალავრის ხარისხს კანზასის უნივერსიტეტიდან, ასევე ბიზნესის მართვის მაგისტრის ხარისხს ბერკლის უნივერსიტეტიდან, ხოლო ამჟამად არის დოქტორის ხარისხის კანდიდატი ქართულ-ამერიკული უნივერსიტეტში.

ბატონმა ჯონასმა იურიდიული განათლება და საადვოკატო პრაქტიკის უფლება მიიღო ვაშინგტონში, კოლუმბიის ოლქში, აშშ. თავისი 35-წლიანი გამოცდილებით, ბატონი ჯონასი შეძლებს მნიშვნელოვანი წვლილის შეტანას „ანაკლიის განვითარების კონსორციუმის“ სამეთვალყურეო საბჭოში. 2005-2014 წლებში იგი იყო საერთაშორისო იურიდიული ფირმის „DLA Piper საქართველოს“ მმართველი პარტნიორი, ხოლო ამჟამად არის „Dentons“-ის უფროსი მრჩეველი. 1990-იანი წლებიდან მოყოლებული, ბატონ ჯონასს ნამუშევარი აქვს საქართველოში მსხვილ საერთაშორისო ინფრასტრუქტურულ პროექტებზე, მათ შორის ნავთობის მილსადენების, ელექტროენერგიის გადამამუშავებელი საწარმოების, პორტებისა და სატვირთო ტერმინალების პროექტებზე. მისი კლიენტები მოიცავს დეველოპერებსა და პროექტის დამფინანსებელ მხარეებს, მათ შორის მრავალმხრივ და სუვერენულ განვითარების ბანკებს. 1992 წელს ამერიკის შეერთებულ შტატებში კერძო პრაქტიკის დაწყებამდე, ბატონი ჯონასი იყო ამერიკის შეერთებული შტატების ფედერალური სააპელაციო სასამართლოს მოსამართლის თანაშემწე და დახმარებას უწევდა ამერიკის შეერთებული შტატების წარმომადგენელთა პალატის ორ წევრს. იგი არის ამერიკის შეერთებული შტატებისა და საქართველოს მოქალაქე, ფლობს ქართულ ენას და უკვე მრავალი წელია ცხოვრობს თბილისში. „ანაკლიის განვითარების კონსორციუმის“ სამეთვალყურეო საბჭოს გარდა, ბატონი ჯონასი არის საქართველოს უმსხვილესი სატელეკომუნიკაციო კომპანია „სილქნეტისა“ და გერმანული საკონსერვაციო ტრასტის - „კავკასიის ბუნების ფონდის“ სამეთვალყურეო საბჭოების წევრი. ეს უკანასკნელი ემსახურება სამხრეთ კავკასიის სამი სახელმწიფოს ეროვნული პარკებისა და დაცული ტერიტორიების მხარდაჭერას. ბატონმა ჯონასმა 1984 წელს მოიპოვა ისტორიის ბაკალავრის ხარისხი კორნელის უნივერსიტეტში და 1991 წელს სამართლის დოქტორის ხარისხი (J.D., cum laude) კორნელის სამართლის სკოლაში.

ბატონი ვუაზა არის კერძო ინვესტიციებში სპეციალიზებული ფრანგული ფინანსური ჰოლდინგის, „Concorde Capital“-ის (სათაო ოფისით პარიზში) პრეზიდენტი. 1980 წლიდან ბატონ ვუაზას ეკავა აღმასრულებელი და სამეთვალყურეო პოზიციები სხვადასხვა კომპანიებში სამშენებლო, ჯანდაცვისა და ფინანსურ სფეროში - საფრანგეთში, შვედეთში, აზიასა და აღმოსავლეთ ევროპაში. ბატონი ვუაზა ფლობს ბიზნესის მართვის მაგისტრის ხარისხს ESSEC-ის ბიზნეს სკოლიდან. ამჟამად, ბატონი ვუაზა არის ფრანგული ბიოტექნოლოგიური კომპანიის - „Magnisense SE-ს“ სამეთვალყურეო საბჭოს თავმჯდომარე, ჰოლანდიური „GRDC BV-ის“ (საინვესტიციო კომპანია, რომელიც ფლობს აქტივებს საქართველოში) სამეთვალყურეო საბჭოს წევრი და ასევე საქართველოში მოქმედი „ახალი სამშენებლო კომპანიის“ სამეთვალყურეო საბჭოს წევრი. ბატონი ვუაზა საფრანგეთისა და საქართველოს მოქალაქეა.

ბობ მეიერი ADC-ს აქციონერი და სამეთვალყურეო საბჭოს წევრია 2017 წლიდან. მას შემდეგ მას წვლილი შეაქვს პროექტის განვითარებაში, როგორც გამოცდილ და დიდი ხნის ინვესტორს (მათ შორის საქართველოში). ბატონი მეიერი აგრეთვე გახლავთ GRDC-ს დამფუძნებელი და ერთ-ერთი მთავარი ინვესტორი, ასევე მისი თავმჯდომარე 2004 წლიდან, ანუ დაარსების დღიდან. ბატონი მეიერი კერძო ინვესტორია, ის გახლავთ ამსტერდამში დაფუძნებული, კერძო ინვესტიციების მართვისა და საკონსულტაციო კომპანიის, Venture Capital Investors V.C.I.B.V.-ს უფროსი პარტნიორი და ორი დამფუძნებლიდან ერთ-ერთი. ჯგუფმა სხვადასხვა კომპანიის მეშვეობით განახორციელა მრავალი კერძო ინვესტიცია ევროპაში, ამერიკასა და განვითარებად ბაზრებში, მათ შორის - მონაწილეობა მიიღო უძრავი ქონების დეველოპერების მსხვილი პორტფელების შერწყმაში ევროპასა და რუსეთში. ბატონი მეიერი საქართველოში ახორციელებს ინვესტიციებს 1992 წლიდან, ის ხელმძღვანელობდა მინერალური წყლის მწარმოებელ კომპანია "ბორჯომის" დაფინანსებასა და რესტრუქტურიზაციას, რომელიც ამჟამად საქართველოს ერთ-ერთ მსხვილ საექსპორტო საწარმოს წარმოადგენს. ვიდრე 1980 წელს VCI-ს დააფუძნებდა, ბატონი მეიერი იყო Risico Kapitaal Nederland B.V.-ის დირექტორი - პირველი ჰოლანდიური ვენჩურული კაპიტალის კომპანია, რომელიც ჰოლანდიის შვიდი წამყვანი კომერციული ბანკის მიერ შეიქმნა და ფინანსდებოდა. 1975 წელს Risico Kapitaal Nederland–ში მუშაობის დაწყებამდე, ბატონი მეიერი Amro Bank-ის საკრედიტო განყოფილებაში მუშაობდა. ამავდროულად, ბატონი მეიერი, რომელიც უტრეხტის უნივერსიტეტის სამართლის მაგისტრის ხარისხს ფლობს, დაინიშნა უტრეხტის უნივერსიტეტის ეკონომიკის ფაკულტეტის ასისტენტ-პროფესორად. 1970 წლიდან 1975 წლამდე ბატონი მეიერი ლექციებს კითხულობდა კორპორატიული დაფინანსების თემაზე და დაწერა წიგნი კოეფიციენტების ანალიზის შესახებ, რომელიც გამოქვეყნებულია Amro Bank-ის მიერ და ამჟამად მე–9 გამოცემით გამოდის. 1978 წელს, ბატონმა მეიერმა შექმნა ევროპული განვითარების კაპიტალის კორპორაცია (EDCC), ვენჩურული კაპიტალის საინვესტიციო ფონდი. 1984 წელს ამსტერდამის საფონდო ბირჟაზე განხორციელდა EDCC აქციების პირველადი საჯარო შეთავაზება (IPO), სადაც Amro ბანკი და NMB ბანკი მონაწილეობდნენ, როგორც ანდერრაიტერები. EDCC-ის დაარსების დღიდან 1996 წლამდე ბატონი მეიერი გახლდათ მისი დირექტორთა საბჭოს თავმჯდომარე. 1986 წლიდან 1990 წლამდე ბატონი მეიერი იყო უმსხვილესი ჰოლანდიური ელექტრო და სატელეფონო კაბელების მწარმოებლის - NKF-ის დირექტორთა საბჭოს წევრი, იყო უძრავი ქონების კომპანია St. Petersburg Property Co. NV-ის დირექტორთა საბჭოს თავმჯდომარე, 1999 წლამდე - Georgian Glass and Mineral Water Co. N.V.--ის საბჭოს თავმჯდომარე.

ბატონი დიმიტრი აბდუშელიშვილი სამეთვალყურეო საბჭოს წევრია 2017 წლიდან და წარმოადგენს აქციონერ კომპანიას Wondernet Express LLP, რომლის ძირითადი საქმიანობაა ექსპორტ-იმპორტის და სატრანზიტო ტვირთების ტრანსპორტირება და კომპლექსური საექსპედიტორო მომსახურება სარკინიგზო და ტრანსპორტირების სხვა საშუალებებით მთელი მსოფლიოს მასშტაბით, ძირითადად კი დსთ-სა და ბალტიისპირეთის ქვეყნების ტერიტორიაზე. ბატონი დიმიტრი აბდუშელიშვილი არის შპს Corbet Group-ის აღმასრულებელი დირექტორი, (ტაშკენტი, უზბეკეთი). იგი პასუხისმგებელია კომპანიის ბიზნესისა და ორგანიზაციული საქმიანობის განვითარებაზე და წარმართავს მოლაპარაკებებს სახელმწიფო და კერძო ორგანიზაციებთან, მათ შორის ძირითად დაინტერესებულ მხარეებთან - საქართველოს რკინიგზასთან და ჩიმკენტის, ფერგანას და ბუხარას გადამამუშავებელ ქარხნებთან. სანამ დაიკავებდა თანამდებობას Corbet-ში, იგი იყო კომპანია Silk Road-ის (უზბეკეთი) წარმომადგენლობის ხელმძღვანელი, მართავდა ლოჯისტიკას, მთავრობასთან და კერძო სააგენტოებთან ურთიერთობას და ბიზნესის განვითარებას. მისი წინა გამოცდილება დიპლომატიურ სფეროს უკავშირდება, ის იკავებდა ეკონომიკური მრჩეველის თანამდებობას საქართველოს საელჩოში უზბეკეთში, თავისი კარიერა მან დაიწყო ანალიტიკოსის თანამდებობაზე საქართველოს ეროვნული ბანკის ფულადი საკრედიტო პოლიტიკის დეპარტამენტში. 1995 წელს დაამთავრა თბილისის სახელმწიფო უნივერსიტეტი, სადაც სწავლობდა ეკონომიკის ფაკულტეტზე.